વય નિવૃત્તિ

પોતાનાં નામનું કાગળીયું ઉખાડતા શ્વાસ ભરાઇ ગયો.

તાળુચાવી હાથમાં લઈ એ ધબ્બ દઇ બેસી પડી.

ખાલીખમ્મ લોકરમાંથી સાયકલોજી, ફિલોસોફી, મેનેજમેન્ટની નોટ્સ નીકળીને જાણે આખા રૂમમાં ઉડી રહી હતી.

“તમે બહુ યાદ આવશો. મેડમ,સંપર્કમાં રહેજો”

આ શબ્દોમાંની લાગણી આશાને ચારેબાજુથી વિંટળાઇ રહી હતી.

કોલેજનો ઘંટ અને ઘટનાઓ કાનોમાં ગૂંજ્યા. કરમાયેલા બૂકેની મીઠી સુગંધથી સંતોષ વ્યાપી ગયો.

— નીવારોઝીન રાજકુમાર